top of page
የ ጥበብ ማዕድ
ለሁሉ
አሁን ነው ማወቄ
ቁሩ ሲበረታ
ምድሩ በበረዶ ማለፊያ ሲነጣ
ሰዉ ተመጣፊያ መጣፊያ ደርቦ ተጨማምቶም እንኳ ቆዳው ገረባብጦ ፊቱ ቢገረጣ
እኔ ግን አለሁኝ
እኔ ግን ነደድሁኝ
እልፍ አእላፍ ተጉዞ ወደኔ የመጣ ጠሀይ እየሞቅሁኝ
የአስራ ሶስት ወር ጸጋሽ በረከትሽ ደርሶኝ
ብቸኝነት ነግሶ ካለሁበት ቀዬ
ያላንዳች አጃግሬ ብቻዬን ቁጭ ብዬ
ድምጽ ከሌለበት
ዝር የሚል ወፍ እንኳ ታሪክ ከሆነበት
ከዚያ ከመንደር ውስጥ ልጄ ሆይ እያለ ዜማሽ ይሰማኛል
ትዝታሽ ወሮኛል
ያንባሰል የባቲ ጨዋታሽ ደርሶኛል
ያ መልካም ጠረንሽ ከሩቅ የሚጣራ
ደርሶኛል እማማ ወንዙን አቆራርጦ ተሻግሮ ተራራ
የምድር ምህዋር ዐይኔ ሚያካልለው ምን እንኳ ቢሞላ
አረንጓዴ ቢጫ ቀይ ቀለም እንጂ መች አይቶልኝ ሌላ
ተመራምሪያለው ብዙ ተጠብቤ
ብዙ ተጨንቄ
በሌለሽበትም የመኖርሽ ምስጢር ቅኔን የተረዳው አሁን ነው ማወቄ
ለካ ጠረን ድምጥሽ
አረንጓዴ ቢጫ ቀይ ቀለም መልክሽ
ስላለም አይደለ ተዚህ ተከተማ
ጠረንሽ ሚደርሰኝ ድምጥሽን ምሰማ
ነገሩ ወዲህ ነው
የእናትነት ፍቅርሽ እንዲህ ተሰንቅሮ ዘሩን የሚዘራ
ለካስ ከውጭ አደል
ለካስ ከልቤ ነው
ማደሪያ የሰራ
የ ባህራን
1 ታህሳስ 2007
bottom of page